Andutz Fundiciones S.A.

Eraikin industriala, 1963 (Joaquín Domínguez Elosegui )
Otaola 9

Deskribapena

Eraikina Agustín Churruca Osak eraiki zuen 1963 eta 1964 artean. Joaquin Dominguez Eloseguik diseinatu zuen: hormigoi armatuzko konposizio simetriko bat da, apaingarririk gabekoa. Eraikina lokal industrialak saltzeko eta alokatzeko erabili zen. Besteak beste, Andutz Fundiciones enpresa egon zen bertan.

Airetik

Planoa

Agustín Churruca Osak eraiki zuen 1963 eta 1964 artean.

Sustatzaile hau Bilbo etorbidean (gaur egun Otaola) kokatuta zegoen industria-lur baten jabea zen. Bertan, industria-eraikin bat jaso nahi zuen, 1963ko martxoan (6908.16) aurkeztutako instantzia batean ikus daitekeenez [6908.16].

Joaquin Dominguez Elosegui arkitektoak diseinatuta, jatorrizko proiektua hormigoi armatuzko eraikin bat zen, solairu bakarrekoa eta angeluzuzena, aurrealdean errepidearekin lerrokatua.Proposatutako bolumena partzelan baimendutakoa baino txikiagoa zenez, baietza eman zitzaion.

1963ko uztailean, eskatu zen eraikitzen ari ziren beheko solairuaren gainean 4 solairu egiteko.Hala ere, ukatu egin zitzaien lizentzia, baimendutako bolumena gainditzen zuelako. Udalak eraikinari altuera txikiagoa ematea gomendatu zuen obra horiek baimentzeko [6908.17].

Azkenik, bi solairu soilik jasotzea eskatu zen, 1963ko urriko eskabidean azaltzen denez; Horretarako, Dominguez Eloseguiren obra-zuzendaritzan eta proiektu batean oinarritu ziren. Izaera funtzionaleko industria-eraikina zen, eta bi komunikazio-gune aurreikusten ziren eraikinaren muturretan, industria-erabilerarako egokiak ziren solairu diafanoak komunikatzeko [6908.19].

Urte horretako urrian, Marcelino Areitiok (lursailaren goialdeko jabeak) eta Agustín Churrukak (behealdekoa) partekatzen zuten lursailaren bereizketa formalizatu zen. Haietako bakoitza lursail baten jabea zen partzela berean, eta bitan banatu zuten, Marcelinok beste tailer bat eraikitzeko asmoa baitzuen [OT-04]. Horretarako, beharrezkoa izan zen plano topografiko bat egitea eta aldameneko lur jabeen oniritzia (Lambretta, Rodamientos Sarasqueta, Guisasola y Ereña) [6908.18].

Eraikina egin ondoren, 1964ko urtarrilean eskatu zen makinen gela bat egokitzea eraikinaren barruan, eta arazorik gabe eman zen horretarako baimena [6916.01].

Eraikinak, ordea, ez zuen energia elektrikorik bere jarduerari ekiteko, Iberduerok ezin zituelako Otaolaren industria guztiak hornitu, eta, beraz, beharrezkoa zen transformazio-zentro berri bat. Hura eraikitzeko lanak lizentziarik gabe hasi ziren, eta arrazoi horregatik, 1964ko apirilean, Udalak 250 pezetako isuna jarri zion "Hijos de M. Churruca" enpresari.Ondorioz, "Churruka eraikineko" industria-jabekideek proiektua aurkeztu zuten 1964ko apirilean orubeen artean kokatutako transformazio-zentroa egiteko, eta obra horiek atzerapenik gabe baimendu ziren [6916.02].

Eraikina lokal industrialak alokatzeko eta saltzeko erabili zuten. Espazio horien errentagarritasuna ikusita, Agustin Churrukak beste solairu bat partzialki eraikitzeko eskatu zuen 1966ko ekainean, Joaquin Dominguezen proiektuan oinarrituz. Arkitektoak zehatz-mehatz arrazoitu zuen proposatutako bolumenak ez zuela baimendutakoa gainditzen, baina lizentzia ukatu egin zitzaion, poligonoaren plan partziala izapidetze-prozesuan zegoelako [6926.16].

Obra horiek ez ziren gauzatu, eta harrez geroztik ez da aldaketa bolumetriko nabarmenik egin eraikinean. Besteak beste, hantxe garatu zuen bere jarduera 80ko hamarkadan Andutz Fundiciones enpresak, trokelgintzara dedikatzen zenak.