Sucesores de Fernando Elcoro S.A.
Deskribapena
Fernando Elcoro Maulandak fundatu zuen enpresa eta 1924az geroztik ageri da industria-matrikulen arabera. Ilea mozteko tresnak ekoizten zituzten, "Espiral" izenarekin komertzializatu zirenak. Hasierako tailerra Barrenkalen egon zen, ondoren Barakaldo kalean eta 1952a aldera Aasuarrekan eraiki zuten fabrika. Ondoren, jatorrizko tailerra "Marbil" enpresari saldu zioten eta 1955ean handitu egin zuten eraikina. 1964ra arte gutxienez jarraitu zuten tailer mekanikoari lotutako jarduerekin eta estaldura mekanikoarekin.
Airetik
Planoa
Argazkiak
Argazki historikoak
Sintesi dokumentala
Fernando Teodoro Elcoro Maulandak fundatu zuen; industria-matrikulen arabera, Barrenkale kalean zegoen finkatuta gutxienez 1924az geroztik. Gero Arrateko pasealekura (gaur egun Barakaldo kalea) joan zen, eta azkenik eraikin berri hau eraiki zuen Aasuaerrekan.
Ekoizpena nagusiki ilea mozteko tresnak ziren, "Espiral" izenarekin komertzializatu zirenak.
1950etik aurrera, hasiera eman zion tailer berria egiteko prozesuari, lehendik eraikia zuenaren ondoan [AS-02].
Lehen eskaera 1950eko apirilean aurkeztu zuen, Felipe Anitua Guisasola ingeniari industrialaren proiektuari jarraituz 6869.47.
Aurreikusten zen tailer txiki bat egitea, solairu bakarrekoa, beheraxeago zeukan enpresatik banandua, hala, bi eraikuntzen artean zamalanetarako espazio bat ahalbidetuz. Nolanahi ere, nahiz eta obra-lizentziari zegokion tasa likidatu, ez zen eraiki.
1952an, Fernando Elcorok berriz ere eskaera egin zuen, Ramon Martiarena Lascurain arkitektoaren proiektu zehatzago batekin: eraikina aurrekoa baino nabarmen handiagoa zen 6874.27.
Aasuaerreka errekaren gainean zegoen kokatua; erreka "zementuzko hodi" batean bideratu zen tailerraren azpitik. Hormigoi armatuz egina, 20x12m-ko oin errektangularra zuen: beheko solairu bat zuen erdi lurperatua gelditzen zena lursailaren aldapagatik, eta oin-solairu bat. Eskailera kanpoaldean zegoen tailerrari atxikia, eta behe aldeko izkina alaka erakoa zen, sarbiderako ate batekin. Ur-estalki laua zuen, etorkizunean handitze-obra gehiago ahalbidetzeko.
Manufacturas Elcoro enpresak jatorrizko tailerra [AS-02] saldu zion “Marbil” enpresari, eta 1955ean enpresaren belaunaldi-aldaketarekin batera handitu egin zuten eraikina. Izan ere, eraikitzeko eskaera Fernandoren alabek sinatu zuten (Ines, Basili eta Consuelo) 6884.14.
Ramon Martiarenak idatzitako proiektuaren arabera, tailerra luzeran 15 metro inguru handitzea aurreikusten zen, eta solairu oso bat altxatzea eraikin osoan. Obra hori oso ondo bereizten da gaur egun, arotzeria motaren aldaketagatik eta fatxadaren koloreagatik.
Familia-enpresaren izena Sucesores de F. Elcoro bilakatu zen; industria-matrikuletan Fernando Elcororen izena mantentzen da erregistroan gutxienez 1964ra arte, tailer mekanikoari lotutako jarduerekin eta estaldura metalikoekin.
Eraikin hau aspaldi geratu zen hutsik, eta gaur egun abandonatuta dago.