Taller Otaola 21

Eraikin industriala, (cat) 1966 (Joaquín Domínguez Elosegui )
Otaola 21

Deskribapena

Eraikin hau Lema-k (torlojugintza eta mekanizatua) eraiki zuen 1963an, Otaola hiribidean. Eraikitzeko eskaera Gregorio Leturiondo Zabalak sinatu zuen 1963ko abuztuan, Joaquin Dominguez Eloseguiren proiektu batean oinarrituta. Lema enpresa Elgetako egungo instalazioetara lekualdatu zen 2000. urtean, gutxi gorabehera. Gaur egun, Fremap enpresaren bulegoek okupatzen dute eraikina beheko solairuan, eta Mein mekanizatuak industria-solairuak hartzen ditu.

Planoa

Eraikin hau “Lema”k eraiki zuen 1963an, Otaola hiribidean, nahiz eta enpresaren jatorria lehenagokoa den.

Tornillería Lema gerra zibilaren ondoren sortu zen, 1941ean. 1942an agertzen da lehen aldiz Merkataritza Erregistroan Leturiondo Marías y Cía "Lema" bezala, torlojugintza-industria eta mekanizazio orokorraren jarduerarekin.

1944ko Eibarko matrikula industrialaren arabera, hasieran Urtzaile kaleko lantegi batzuetan egon ziren, non arma eta bizikleten tailer gisa kotizatzen zuten, ziur aski beste enpresa batzuetarako piezak fabrikatuz.Hala ere, 50eko hamarkadan, BOJ [M-03] tailerreko lehen solairuan egon ziren, harik eta lantegi hau Otaolan eraiki zuten arte.

Eraikitzeko eskaera Gregorio Leturiondo Zabalak sinatu zuen 1963ko abuztuan, Joaquin Dominguez Eloseguiren proiektuari jarraituz. Dena dela, 1963ko martxoan hasita zeuden lur-erauzketa lanak, Pedro Leturiondok, aurrekoaren anaiak, egindako eskaera onartu ondoren [6911.21].

Lursaila errepide nagusiaren ondoan zegoen, lurzati partekatu batean. Hala izanik, eraikin berriak mehelin bat eta barne-patio bat zituen, ondoko eraikinarekin partekatzen zituena. Aldameneko eraikina arkitekto berak diseinatu eta eraiki zuen urtebete geroago, eta bi eraikuntzetarako fatxada bateratua proiektatu zuen.

Eraikinak beheko solairua eta bi solairu ditu, eta diseinu berezia, eraikuntza-prozesuan errespetatzen dena. Fatxadan bi bolumenen baturari dagokion konposizio bolumetrikoa ikus daiteke: batetik, nabe industrialei dagokiena, leihate horizontal zabalekin eta, bestetik, eskailera-kaxaren bolumena, altuera handiagoarekin eta urradura bertikalekin.

Lema enpresa Elgetako egungo instalazioetara lekualdatu zen 2000. urtean, gutxi gorabehera. Gaur egun, "Fremap" enpresaren bulegoek okupatzen dute eraikina beheko solairuan, eta "Mein mekanizatuak" industria-solairuak hartzen ditu.